25N – DÍA INTERNACIONAL ESCONTRA LES VIOLENCIES MACHISTES
A fecha de redactar esti manifiestu, 68 muyeres y 2 neñes fueron asesinaes en 2025. Yá son 2.094 los fe- minicidios documentados nel Estáu español desque esisten rexistros (2003). Nun son sólo cifres: son vides arrebataes, víctimes que siguen aumentando día ente día.
Anguaño, más de 105.000 casos activos tán so la protección nel sistema VioGén, con miles de muyeres y menores entá en situación de vulnerabilidá. Detrás de cada datu hai vides y hestories que nos apellen. Cada feminicidiu ye una alerta ignorada, una vida arrebatada pola neglixencia institucional y social.
Les violencies machistes son estructurales y adopten múltiples formes. Una de les más crueles ye la violencia vicaria, utilizada como castigu y control al traviés del dañu a les criatures o persones queríes. Apura garantizar la protección real de la infancia y el so derechu a ser escuchada, asitiando siempres el so bienestar nel centru. La so protección nun puede depender de voluntaes individuales, sinón de polítiques públiques firmes, con recursos abondos y enfoque feminista.
¡Abasta yá de revictimizales! La responsabilidá ye de los que les dexen desamparaes, a la mercé de los sos agresores, y de los que callen o miren p’hacia otru llau.
Les violencies interseccionales cuten con más fuerza a les qu’el sistema patriarcal y capitalista vuelve entá más vulnerables: muyeres migrantes, racializaes, LGTBIQA+, con cuerpos non normativos, mayores, con discapacidá o en situación de dependencia, amás de muyeres cuidadores, que tamién enfrenten la violencia en toles sos formes —tamién la institucional— acaldía.
Visibilizar estes realidaes y actuar dende una perspectiva inclusiva y tresformadora nun ye una opción: ye una necesidá. La interseccionalidá ye clave para construyir respuestes que nun dexen a naide atrás.
Dende CGT denunciamos la violencia institucional que revictimiza, invisibiliza o desoi. Les instituciones que tendríen de garantizar derechos conviértense n’axentes d’esclusión, afondando la precariedá y la esposición a otres violencies.
Centrar el focu nes victimas nun funcionó: pongámoslu nos agresores. A ellos tien de dirixise la denuncia social, la culpa y la vergoña.
Reclamamos recursos públicos, formación feminista, acompañamientu integral y autonomía real pa toles persones que sobreviven a la violencia. Y desiximos que la educación y la formación seyan pilastres fundamentales de cualquier política pública escontra les violencies machistes.
La violencia machista tamién se reinventa nes redes sociales, reproduciendo ente la mocedá los mesmos patrones de dominación y sometimientu. L’acosu, la vixilancia y la humildación dixital son nueves formes de control patriarcal que refuercen la desigualdá. La esposición constante a conteníos machistes, al cultu al cuerpu y a vides inreales amplifica’l mensaxe de violencia, subordinación y una utopía reaccionaria amarutada d’elección.
Desiximos una respuesta colectiva: prevención real, educación afeutivu-sexual y alfabetización dixital con perspectiva feminista pa desmontales, y que les plataformes dixitales asuman la so responsabilidá frente a estes violencies.
Les guerres y los xenocidios, como’l que sufre’l pueblu palestín, según los desplazamientos forzaos, son espresiones estremes de la violencia patriarcal, capitalista y colonial. Nun puede haber paz ensin xusticia feminista.
Reivindicamos la fin de toles formes de violencia:
- Llaboral, que nos esplota y precariza, negando derechos y conciliación.
- Sexual, que nos afrella y cosifica, normalizando l’abusu.
- Sanitaria, qu’ignora les nueses necesidaes y decisiones.
- Xudicial, que cuestiona a les víctimes, revictimiza y favorez la impunidá.
- Económica, que sustién la dependencia y la feminización de la probedá.
- Vicaria, qu’utiliza a les criatures y los ciños como armes.
- Institucional, que falla en prevenir, protexer, reparar y garantizar.
La culpa y la vergoña tienen de camudar de llau. Nun callar, nun mirar pa otra fastera. La responsabilidá ye colectiva: el silenciu tamién ye complicidá.
El 25N nun ye sólo una fecha: ye una llucha que sustenemos acaldía, en cada barriu, en cada centru de trabayu y en cada espaciu de vida.
Dende CGT caltenemos viva la denuncia tou l’añu, espublizando cada feminicidiu, cada asesinatu, cada hestoria que’l sistema intenta borrar.
Porque mientres haya una sola persona amenaciada, nun va haber xusticia nin llibertá. El to silenciu faite cómpliz. Non más violencies machistes.